Accolta
Accolta Storia di u muvimentu Organizazione Cuntatti Adesione/Daziu Ligame
Accolta Attualità Apputamentu Elezzione Interviste Multimedia A Francia Fora Pulitica Ripressione Terra Corsa Culunisazione Lingua è Cultura Ecunumia è Suciale Internaziunale In memoria E Ghjurnate



06/08/2006

Ghjurnati : u principiu di sulidarità intarnaziunali



Erani parechji quist’annu i diligazioni intarnaziunali di i populi è nazioni in lotta à essa raprisentati in Corti. Da a cunfaranza stampa à u dibatittu publicu, u bisognu si risenta di metta in ballu un andatura di principii pà rammintà i dritti nigati. Frà issi dritti quiddu di scedda ben sicuru u so avvena.

I diligazioni


Cum’è l’annu passatu sò dunqua vultati i diligazioni di u Paesi Bascu (Batasuna), di a Catalogna (Ezquerra Republicana Catalana), di a Sardegna (Sardigna Natzione è Indipendenza Reppubrica Sarda), di a Britania (Emgann). Hè statu scusatu u raprisententi di u Scottish National Party è u fattu novu di quist’annu fu, cù successu, a diligazioni di a Pulinesia.


U Tavini

Ghjunti in trè parsoni, Thierry Pousset, Maamaatuaihutapu Maurea è Le Caill Heinui, issa diligazioni hà spiegatu ciò ch’ellu hè u muvimentu indipendentistu pulinisianu, a rialtà di u so puteri di pettu à a Francia chì, culàdinò circa sempri à sottumetta un populu.

A’ u dibatittu, Thierry Pousset spigaia bè u sensu di u « tavi » ind’è u so paesi chì cumprenda 218 isuli è chì faci a surfaza di u tarritoriu francesi. U « tavi » vò di cambiamentu.

E’ dipoi 2004 u partitu « Tavini » ottena a maghjurità è dunqua prova di fà avanzà una pulitica chì difenda l’intaressi di u so populu. Thierry Pousset hà spiegatu bè dinò chì ci vulia à aspittà ch’idda crescia a cuscenza pulitica di a so cumunità, è pocu à pocu da a lotta contr’à u nucleariu in 1966, annu induva schiatta a prova di a bomba, sin’à u votu populari di 2004, pocu à pocu ind’è u rispettu di i stituzioni in piazza, s’hè manifestatu l’intelligenza di un votu pà cambià è custruì un altru avvena.


« L’autonomia l’emu cunisciuta ! »

Thierry Pousset rivindicheghja chjaramenti a necessità di l’indipendenza pà u so paesi. Dici pà via di una frasa simbolica di a so cultura chì ind’è iddu « chì u pani cresci nant’à l’arburi ind’è noi, ùn emu chè à coglia !!! » E’ dici dinò « cum’è si pò campà ind’è a miseria cù 5 000 000 chilometri quadrati ? ». ghjè una manera di risponda à a prupaganda culunialista francesa chì metta ind’è i spiriti di a ghjenti chì cù l’indipendenza ùn si pò micca campà è ghjè un passu in daretu… Pà u raprisententi di u « Tavini », l’autonomia ùn hà guarantitu i dritti di u so populu è ùn hà permissu ch’iddu svillupeghja a so ecunumia cum’è si pudia.

Eccu parchì creda piuttostu ind’è una suvranità intera chì ind’è un sistemu chì ùn pidda in contu tutti i pussibilità di issa cummunità.


L’attualità basca

Pà Batasuna, pà via di u so cunnisciutu raprisententi, Joseba Alvarez, a situazioni in u Paesi Bascu s’appoghja nant’à a pussibilità d’avanzata dipoi u cessa focu d’E.T.A. è a ricunniscenza da u guvernu spagnolu di i cuntatti cù l’urganisazioni armata è rivuluzionaria basca, ma ci voli quantunqua à sapè chì « Batasuna » hè sempri ghjuridicamenti illegala è dunqua frà u discorsu è a rialtà pulitica, ci hè quantunqua una sfarenza… U prublema cuntinueghja à punesi duppiamenti parchì cù a Spagna ci hè dinò a Francia è u guvernu in piazza ùn hà piddatu pusizioni ufficiali nant’à a quistioni di a partita basca sottumissa à a Francia… E’ al di là di i stituzioni, Joseba Alvarez priciseghja chì « ci voli i muvimenti suciali » è chì « a risistenza hè nicissaria ».


Una cumunicazioni cummuna

I raprisententi di a Sardegna ani dinò spiegatu a cuntinuità di a pulitica di duminazioni italiana in Sardegna ancu s’idda hè dinò autonoma. Listessa pusizioni ind’è un altru quadru di a diligazioni catalana cù Jordi Miro è Enrique Uriel chì spiegani chì u so partitu di guvernu ùn puddia accettà i novi cundizioni stituziunali missa in ballu da a Spagna pà garantiscia u fattu naziunali di a Catalogna. Infine Faich Oger pà « Emgann » chì rammenta a situazioni di difficultà ch’idda cunnosci a Britania. Hà missu in rilievu a cuscenza di a ghjenti pà a so cultura è a so lingua di fronti à l’amminnistrazioni francesa chì i ricusa…

E’ i punti impurtantissimi di issi ghjurnati pà via di i diligazioni prisenti funi i scambii pulitichi è strategichi è a scedda di una cummunicazioni cumuni di tutti i populi in lotta di l’ultimi culunii di Francia (documentu unu).

Nant’a u sicondu ducumentu si sò aghjunti dinò Anaram Au pattac d’Uccitania, u M.D.E.S pa a Guiana e u PK.L.S. e u C.N.C.P. pa a Martinica.


I documenti di l’avvena

Issi ducumenti sò principi annant’à quali ci voli à appughjassi pà cunsulidà i nosci raporti cumuni di forza è fà valè i nosci dritti di nazioni suttumissi. E’ ind’è u cuntestu di l’alizzioni à a prisidenziali francesi da quì à qualchì mesu saria bè chì i muvimenti è partiti indipendentisti di i tarritorii occupati da a Francia riflettini insembu à a pussibilità di fà poni à issu mumenti a rialtà di a centralisazioni francesa chì niga i dritti universali di i populi à scedda da par iddi u so avvena. Ghjè cusì cum’è l’hà dittu Ghjuvan Guidu Talamoni, elettu à l’assemblea tarrituriali di Corsica è militenti di Corsica nazioni Indipendenta chì ci voli à strappà a noscia emancipazioni à u statu francesi ».

Ulivieru Sauli


Documentu unu

Dichjarazioni cumuna à l’urganisazioni chì dumandani u drittu à l’autodeterminazioni à u Statu francesu :


Noi, urganisazioni di i populi bascu, catalanu, britonu, corsu, guianesu, martinicanu è taizianu, in virtù di u drittu naziunali è in rifirenza à a risoluzioni 1514 di i Nazioni Uniti è di a carta di i dritti civili è pulitichi di i Nazioni Uniti di u 1966, dichjaremu sulannamenti u carattaru imprescrittibili è inalienabili di i dritti seguenti :

1°) Drittu di metta in opara in u quatru di un statutu ufficiali, u sviluppu di nosci lingui è di i nosci culturi.
2°) Drittu di prumova è d’ammaistrà u so sviluppu economicu è suciali.
3°) Drittu à a ricunniscenza comu populu è nazioni.
4°) Drittu à l’autodeterminazioni.
5°) Drittu di metta in opara un prucessu di sculunisazioni.





 

© Corsica Nazione Indipendente — 2008