“Sabatu, Corsica Nazioni Indipendente sarà accant’à tutti quiddi chì manifistarani pà a difesa di u litturali corsu

Nimu un pò nigà che a leggi litturali di u 1976 cuntribuisci à prisirvà l’ambienti custieru è i so ricchezzi, è ni garantisci a libara fraquentazioni è circulazioni publica pà tutti.

Un’hè un azardu si oghji in Corsica, ci sò schema di sclassificamentu è dunqua di custruibilità di spazii definiti rimarchevuli chì alimentani u pianu d’acconciu è di sviluppu durevuli, è si i so principali instigatori sò quiddi chì oghji, à l’esecutivi di a cullittività tarrituriali è in certi municipalità vicinu à i costi, volini u smantellamentu di a leggi litturali è a fini di a santuarisazioni di l’isula.

Issi logichi speculativi di spussessu facini parti di un pianu ultragiosamenti videvuli di missa in minuranza di a cumunità corsa da u Statu francesu, pà arrubacci a noscia mimoria è a noscia pruprietà di un tarrititoriu naturalmenti definitu. Issu pianu hà un nomu : culunizzazioni di pupulamentu.

A’ un mumentu induva l’assenza vulsuta di un quadru giuridicu è cittadinu corsu permetti, incù a scusa di un’ecunumia di marcatu, a vendita è l’accapparamentu di pezzi intrevi di u patrimoniu storicu è naturali, CORSICA NAZIONI INDIPENDENTI ùn pudia chè essa prisenti incù tutti quiddi chì volini pà a Corsica un altru sviluppu fundatu annant’à a cunsiderazioni identitari è à long’andà.

Ma a noscia prisenza à issa manifestazioni ùn pò fà sminticà i nosci dubiti è i nosci interrogazioni annant’à i limiti d’issa leggi liturali quandu si sà chè attualmenti a nuzioni di « paisolu novu » pò ancu favuriscia u spussessu, a speculazioni è ancu a culunisazioni di pupulamentu.

Al di là di una leggi, di i so vantagghji è di i so limiti cuntradittorii, CORSICA NAZIONI INDIPENDENTI voli muscià l’impurtanza di una riflissioni più prufunda annant’à a necessità di metta in ballu un quadru ghjuridicu glubali chì garantischi a prutezioni di u nosciu patrimoniu tarrituriali chì ùn si ferma à u liturali, è a ricunniscenza di a so cumunità chì l’hà sturicamenti è pà a quali ùn ci hè nisciun drittu naziunali.

A TARRA HÈ DI U POPULU CORSU !!!”

© Corsica Nazione Indipendente — 2008